जैताई मातृगौरव पुरस्कार, २०२४

“जैताई मातेचा प्रसाद स्वरूपातील हा पुरस्कार आयुष्यातील एक अवर्णनीय आनंद आहे” असे म्हणत सत्काराला उत्तर देताना परमपूज्य सद्‍‍गुरु श्री शिरीषदादा कवडे यांनी जगदंबेच्या या विजयदुर्गा स्वरूपाचे वर्णन करीत देवीच्या आणि वणीच्या बालपणीच्या आठवणींना उजाळा दिला. “आपापल्या क्षेत्रात अग्रेसर असलेले अनेक दिग्गज वणीत त्याकाळी वास्तव्याला होते” असे सांगून, “श्री नानासाहेब शेवाळकरांनी या आडवळणाच्या गावाला साहित्याचे वळण लावले” असे म्हणत त्यांनी वणीतील प्राचीन ज्ञान परंपरेला वंदन केले. वणी हे आपले जन्मग्राम नसले, कर्मग्राम नसले तरी हे गाव, जेथे त्यांचे सर्व प्राथमिक व उच्च माध्यमिक शिक्षण झाले ते, आपले ‘ज्ञानग्राम’ आहे असा त्यांनी आवर्जून उल्लेख केला. श्री दादांचे अनेक शाळकरी सुहृद ह्या विशेष सोहोळयासाठी उपस्थित होते ही त्यांच्यासाठी मोठीच आनंदाची बाब होती.

“आपल्या मूळ आधारापासून तुटल्यामुळे, आज माणूस निराधार होत आहे. जीवनाकडे पाहण्याची शुद्ध दृष्टी गमावून बसला आहे. भासमान दुःखाने ग्रस्त आहे. जीवनामध्ये झपाट्याने ऱ्हास पावत असलेली नीतिमत्ता, संस्कार ही खरोखरच अत्यंत काळजीची गोष्ट झाली आहे” असे प्रतिपादन करीत “सात्विकतेचे अधिष्ठान देऊन व्यक्तीला सत्कार्यप्रवृत्त करणे हेच धर्माचे प्रथम स्वरूप आहे” हे त्यांनी ह्या प्रसंगी अधोरेखित केले.

कार्यक्रमाचे सूत्रसंचालन तथा आभार प्रदर्शन जैताई देवस्थानचे सचिव भागवत कथाकार मनुमहाराज तुगणायत यांनी केले. सौ रेणुका अणे यांनी गायलेल्या पसायदानाने कार्यक्रमाची सांगता झाली.