भगवान श्री श्रीपाद श्रीवल्लभ स्वामी महाराज जयंती महोत्सव, २०२४

या महोत्सवासाठी ‘श्रीपाद सेवा मंडळा’च्या पुणे, मुंबई, कऱ्हाड, कोल्हापूर, आंबेरी, गोवा, अकोला, अमरावती, नागपूर, वणी, भिलाई अशा विविध केंद्रांमधून साधक-भक्तजन उपस्थित होते. प्रकल्पस्थानी आल्यावर भगवान श्री श्रीपाद श्रीवल्लभ स्वामी महाराजांचे अतिशय प्रसन्न, सुहास्यवदन, चित्तवेधक, नयनमनोहर अशा बालरूपातील दर्शन घेतल्यावर उत्सवाला आलेल्या प्रत्येकाचा प्रवासाचा शीण कुठल्या कुठे पळून जात होता. ‘याचसाठी केला होता अट्टहास’, अशीच प्रत्येकाची भावना होती.

उत्सवासाठी मंदिर परिसर सुबक, सुंदर रांगोळ्यांनी, फुलांनी, विद्युत रोषणाईने फारच उत्तम प्रकारे सजवला होता. प्रकल्पस्थानी चार मजली नवीन इमारतीचे; ‘अन्नपूर्णा’चे; बांधकाम नुकतेच पूर्ण झाले आहे. अतिशय प्रशस्त, भव्य अशा या वास्तूत उत्सवासाठी आलेल्या बहुसंख्य साधक-सद्‌भक्तांची राहाण्याची अतिशय उत्तम सोय करण्यात आली होती. साधकांकडून आपल्या सिद्धस्थानांवर साधन व्हावे, या पावन सद्‌गुरुस्थानांची सेवा घडावी म्हणून कनवाळू श्रीसद्‌गुरु साधकांसाठी किती सोई-सुविधांची व्यवस्था करतात, हे नवीन झालेल्या भव्य बांधकामावरून प्रकर्षाने जाणवत होते.

महोत्सवाच्या आदल्या दिवशी, प.पू.सद्‌गुरु श्री.दादांनी स्वतः जातीने सगळी तयारी पूर्वनियोजनाप्रमाणे झाली आहे याची खातरजमा केली होती. विविध केंद्रांमधून प्रकल्पावर आलेले स्वयंसेवक स्थानिक साधक बंधुभगिनींना मदत करायला तत्पर होते.

दिनांक ६ सप्टेंबर रोजी दुपारी २.३० वाजता जळगांव (जामोद) येथील ‘श्रीसरस्वती महिला भजनी मंडळा’च्या भजनसेवेने महोत्सवातील कार्यक्रमांस सुरुवात झाली. श्रीभगवंतांच्या श्रीचरणीं श्रवणीय गायनसेवा रुजू केल्याबद्दल मंडळाचे विश्वस्त समिती सदस्य श्री.संतोष बोरगांवकर काका यांच्या हस्ते या भगिनी मंडळाचा सत्कार करण्यात आला.

सायंकाळी ५.१५ ते ६.३०या वेळेत प.पू.सद्‌गुरु श्री.अनिरुद्धदादांच्या परममंगल सान्निध्यात ‘श्रीदत्तभावांजली’ स्तोत्राचे सामुदायिक पठण करण्यात आले. त्यानंतर श्री.चिन्मय देशपांडे, श्री.श्रेयस पाटील, श्री.वेद खोपकर, श्री. महेश ताम्हणकर, श्री.सुदर्शन देशपांडे, श्री.निशिकांत जोशी तसेच सौ.रमा खाडिलकर या साधक बंधुभगिनींनी श्रीसद्‌गुरूंच्या श्रीचरणीं सुश्राव्य अशी अभंग-गायनसेवा सादर केली. त्यासाठी त्यांना संवादिनीवर श्री.विजय उपाध्ये, मृदंगावर श्री.मनोज भांडवलकर व श्री.रवींद्र देसाई यांनी उत्तम साथ दिली.

नित्याची सायंआरती झाल्यानंतर सर्व बंधुभगिनींनी अल्पोपाहार घेतला. रात्री ९ नंतर श्रीक्षेत्र आंबेरी येथील साधक बंधू श्री.राजेश आवटे व साथीदारांनी ‘श्री हरिपाठ’ गायनसेवा श्रीसद्‌गुरुचरणीं रुजू केली. अतिशय भावपूर्ण अशा या श्री हरिपाठ गायनसेवेत सगळेच उपस्थित सहभागी झाले होते. या दिव्य-आनंदाचा अनुभव सोबत घेऊन दुसऱ्या दिवशी पहाटे साजऱ्या होणाऱ्या देवांच्या जन्मकाळाच्या विचारांमध्ये सगळे आपापल्या निवासस्थानी विश्रांतीसाठी रवाना झाले.