प.पू.सद्‍गुरु योगिराज श्री.श्री.द. (मामा) देशपांडे महाराज यांचा चौतिसावा आणि प.पू.सद्‍गुरु मातुःश्री सौ. शकुंतलाताई आगटे यांचा पंचम पुण्यतिथी महोत्सव, पुणे २०२४

दिनांक ३ एप्रिल रोजी, ‘माउली आश्रम’ व ‘श्रीपाद निवास’ तसेच ‘अन्नपूर्णा’ या इमारतींचा परिसर स्वच्छ करून सुंदर पुष्पमालांनी सजविला होता. ‘श्रीपाद निवासा’तील व ‘माउली आश्रमा’तील श्रीसद्‌गुरुपरंपरेच्या प्रतिमांना व प.पू.सद्‌गुरु श्री.मामा महाराज व प.पू.सद्‌गुरु सौ.ताई महाराज यांच्या प्रतिमांना सुगंधी, सुंदर पुष्पमाला अर्पण केल्या होत्या. ‘अन्नपूर्णा’ इमारतीत तळमजल्यावर सर्व साधकांच्या सोयीसाठी ‘श्रीवामनराज प्रकाशना’चे ग्रंथ तसेच ‘अमृतबोध’ मासिक यांचे स्टॉल्सही लावण्यात आले होते.

‘श्रीपाद निवासा’त सकाळी ठीक ७.१५ ते ८.१५ या वेळेत सामुदायिक साधना संपन्न झाली. ‘माउली’मध्ये सकाळी ठीक ७ ते ९ या वेळेत सौ.स्नेहल व श्री.पराग गुमास्ते यांच्या हस्ते ‘श्रीसत्यदत्त पूजा’ आणि सौ.दीप्ती व श्री. अमेय जोशी यांच्या हस्ते ‘श्रीसद्‌गुरुपादुका-पूजन’ संपन्न झाले. गोव्याचे श्री.दत्तगुरु व श्री.सुरेंद्र गुरुजी यांनी या प्रसंगी पौरोहित्य केले.

सकाळी ११.३० वाजल्यापासून ‘श्रीकृष्ण गोविन्द हरे मुरारे । हे नाथ नारायण वासुदेव ॥ गोविन्द गरुडध्वज प्राणप्यारे । हे नाथ नारायण वासुदेव  ॥’ व ‘जय जय करुणामूर्ति दयाळा जय जय श्रीपादा । जय जय सद्‌गुरु अनाथनाथा जय जय श्रीपादा ॥’ या नामजपांनी ‘माउली’ परिसर दुमदुमून गेला. प.पू.सद्‌गुरु श्री.शिरीषदादांचे ११.४५ वाजता ‘माउली’त आगमन झाले तेव्हा तर साधकांमध्ये एक वेगळाच उत्साह संचारला. दुपारी ठीक १२ वाजता शंखनादासह घंटा, झांजा, मृदंग, संवादिनी अशा वाद्यांच्या गजरात प.पू.सद्‌गुरु श्री.मामांचा तसेच प.पू.सद्‌गुरु मातुःश्री सौ.ताईंचा जयजयकार करून पुण्यकाल साजरा करण्यात आला. त्यानंतर आरती व मंत्रपुष्पांजली झाली. समस्त साधक-बंधुभगिनींच्या वतीने प.पू.सद्‌गुरु श्री.दादांनी श्रीसद्‌गुरुद्वयांच्या सुकोमल श्रीचरणीं गुलाबपुष्प-पाकळ्या समर्पित केल्या. देवांचे, श्रीसद्‌गुरूंचे दर्शन व तीर्थप्रसाद घेऊन हा सकाळचा कार्यक्रम संपला.

सायंकाळी ठीक ४ ते ५ या वेळेत, ‘श्रीपाद निवासा’त आपल्या साधक-बंधूंनी ‘श्री हरिपाठ-गायनसेवा’ श्रीसद्‌गुरुचरणीं रुजू केली. त्यानंतर सायंकाळी ६.३० वाजता ‘श्रीपाद निवास’ येथे राजोपचार-महापूजा आयोजित करण्यात आली होती. प्रथम संकल्प व तदनंतर श्रीगणेशपूजन करण्यात आले. पूर्वपूजेत उभय श्रीसद्‌गुरुपादुकांना पंचामृत स्नान, फलरस-स्नान व पुष्पोदक-स्नान संपन्न होऊन तदनंतर अभिषेक, अलंकार-पूजा, नैवेद्य व आरती झाली. त्यानंतर चार वेद, पंचांग, पुराण, शास्त्र, संगीत (गायन व वाद्य सेवा), नृत्य, चामर, नामजप इत्यादी सेवा अत्यंत भावपूर्ण वातावरणात श्रीसद्‌गुरुचरणीं समर्पित करण्यात आल्या.

वेदमूर्ती श्री.दत्तात्रेयशास्त्री जोशी व त्यांचे सहकारी ब्रह्मवृंद हे या प्रसंगी राजोपचार-महापूजेत अतिशय तन्मयतेने सहभागी झाले होते. तसेच कु.श्रुती कानिटकर यांनी शास्त्रसेवा, कु.विलीना फडणीस यांनी नृत्यसेवा, कु.शाल्मली भालेराव यांनी गायनसेवा, श्री.श्रेयस पाटील व श्री.चिन्मय देशपांडे यांनी चामरसेवा, श्री.सुधन्वा कुलकर्णी यांनी वाद्यसेवा तसेच काही साधकबंधूंनी नामजपसेवा श्रीसद्‌गुरुचरणीं समर्पित केली.

प.पू.सद्‌गुरु श्री.दादांनी सर्व ब्रह्मवृंदास वस्त्रे व दक्षिणा अर्पण करून त्यांचे आशीर्वचन घेतले. श्रीसद्‌गुरुवंदन करून व तीर्थप्रसाद घेऊन रात्री ११  च्या सुमारास समस्त साधक-बंधुभगिनी श्रीसद्‌गुरूंच्या महन्मंगल व पवित्र स्मृती उराशी जपत आपापल्या गंतव्यस्थानी रवाना झाले.