प.प. सद्‌गुरु श्री. वासुदेवानंद सरस्वती स्वामी महाराजांचा पुण्यतिथी महोत्सव आणि प.पू. सद्‌गुरु श्री. मामा महाराजांचा जयंती महोत्सव, कराड २०२४

पहिल्या सत्रातील प्रवचन-सेवेनंतर शंका-समाधानाचा कार्यक्रम झाला. त्या वेळी प.पू.श्री.सद्‌गुरु शिरीषदादांनी साधकांच्या विविध पारमार्थिक शंकांचे समूळ निरसन केले. एका प्रश्र्नाला उत्तर देताना त्यांनी सांगितले की; ‘‘साधकाने साधना करत असताना येणारे विविध शुभ अनुभव, बैठकीदरम्यान होणाऱ्या क्रिया, सद्‌गुरुदर्शन यांचा आनंद घ्यावा. सतत श्रीसद्‌गुरूंच्याच स्मरणात राहावे. तो सद्‌गुरुकृपेचा व त्यांच्याच करुणेचा प्रत्यय असतो. मात्र अशा अद्‌भुत अनुभवांनी प्रसंगी अहंकार वाढीस लागू शकतो. तसे होऊ देऊ नये. साधनेदरम्यान येणारे अनुभव, क्रिया, होणारी दर्शने अशा सर्व गोष्टी भगवतीच्या इच्छेवर, सद्‌गुरुकृपेवर सोडून द्याव्यात. जगभरात अस्तित्वात असलेले सर्वच परमार्थ-मार्ग हे सद्‌गुरुकृपेवर, शक्तीच्या कृपेवर अवलंबून असल्याने ही कृपा होणे अत्यावश्यक आहे.

प्रेमाने व नित्य साधन झाल्यास सर्व जीवांप्रति अंतःकरणात समभाव उत्पन्न होतो. सर्वच जीव हे भगवत्स्वरूप असल्याची सतत जाणीव ठेवून वागल्यास, त्यायोगे आपल्यातील दोष कमी होतील. यालाच ‘भगवद्‌भाव स्थिरावणे’ असे म्हणतात. हे देखील ज्ञानाचेच लक्षण आहे !’’

दुसऱ्या दिवशी सकाळी ठीक ७.०० वाजता, प.पू.श्री.अनिरुद्धदादांच्या उपस्थितीत सामुदायिक साधनेने कार्यक्रमांची सुरुवात झाली. अल्पोपाहारानंतर साधकांनी ‘श्रीगुरुसाहस्री’चे तसेच ‘श्रीदत्तभावांजली’चे वैयक्तिक वाचन केले. त्याच वेळी सौ.श्रुती व श्री. विराज कुलकर्णी यांच्या हस्ते श्रीसत्यदत्त पूजा व सौ.भाग्यश्री व श्री.कृष्णाजी कुलकर्णी यांच्या हस्ते श्रीसद्‌गुरुपादुका-पूजन संपन्न झाले.

कार्यक्रमस्थळी ‘श्रीवामनराज प्रकाशना’च्या ग्रंथांच्या स्टॉलला तसेच ‘संस्कृती संवर्धिनी फाऊंडेशन’द्वारे प्रकाशित होणाऱ्या ‘अमृतबोध’ मासिकाच्या स्टॉललाही अनेकांनी भेट देऊन, अभ्यासास उपयुक्त अशा अनेक ग्रंथांची खरेदी केली. त्याचबरोबर श्रीक्षेत्र आंबेरी येथील विविध सेंद्रिय उत्पादनांच्या विक्री-स्टॉललाही उपस्थितांनी चांगला प्रतिसाद दिला.

सकाळी ठीक १०.३० वाजता प.पू.सद्‌गुरु श्री.अनिरुद्धदादा यांच्या प्रवचन-सेवेस आरंभ झाला. सुरुवातीला त्यांनी आदल्या दिवशी झालेल्या प्रवचन-सेवेतील मुद्द्यांचा थोडक्यात आढावा घेतला आणि त्यानंतर हृदयात ज्ञान प्रकटल्याने दिसणाऱ्या चिन्हांचा विचार व त्यांची लक्षणे विस्ताराने सांगितली. ‘अदंभित्व’ या चिन्हाची लक्षणे सांगताना प.पू.श्री.अनिरुद्धदादा म्हणाले की; ‘‘केलेल्या परोपकाराची गुप्तता ठेवणे, आपला अभ्यास न मिरविणे, आपल्या ज्ञानाचा अहं न बाळगणे, सामर्थ्य व कीर्ती झाकून ठेवून कार्य करणे ही काही ठळक लक्षणे अदंभित्व दाखवून देतात. या सर्वच लक्षणांचे मूर्तिमंत उदाहरण म्हणजे प.पू.सद्‌गुरु सौ.ताई होत !’’

प.पू.सद्‌गुरु सौ.ताईंच्या ठायी प्रखर ज्ञान आणि ज्ञानचिन्हे प्रकट झाली होती. ती त्यांच्या स्थूलदेहावरही दिसत असत. हे दर्शविणारे त्यांच्या जीवनचरित्रातील काही प्रसंग प.पू.श्री.अनिरुद्धदादांनी निरूपणाच्या ओघात सांगितले. पुढे ते म्हणाले की; ‘‘ही ज्ञानचिन्हे पुढे अधिकाधिक गहन होत जातात. यांमध्ये ‘अहिंसा’, ‘क्षमा’, ‘आर्जव’, ‘सद्‌गुरुभक्ती’, ‘आचार्योपासना’ असे अनेक प्रकार आहेत. वेळेअभावी त्या सर्वांचाच विचार करणे येथे शक्य होणार नाही !’’
‘‘सातत्याने श्रीसद्‌गुरुस्मरण करावे तसेच नेमाने व प्रेमाने साधना करावी;’’ असा कळकळीचा उपदेश करून प.पू.सद्‌गुरु श्री.अनिरुद्धदादांनी आपली झालेली प्रवचन-सेवा श्रीसद्‌गुरुचरणीं समर्पित केली.

यानंतर शंका-समाधानाच्या दुसऱ्या सत्राचे आयोजन करण्यात आले होते. सद्यकाली घरोघरी नव्या पिढीमध्ये संस्कारांचा दिसणारा अभाव आणि लोपत चाललेले शास्त्रांचे ज्ञान याब‌द्दल प.पू.श्री.दादांनी या वेळी तीव्र खेद व्यक्त केला. त्यानंतर व्यवहारातील काही चपखल उदाहरणे तसेच संत-साहित्यातील समर्पक दाखले देऊन, अत्यंत मार्मिक आणि यथोचित मार्गदर्शन करून त्यांनी साधकांच्या मनातील अनेक शंकांचे समूळ निरसन केले.

‘‘वैराग्य हेच साधकाचे सर्वोत्तम आभूषण आहे. मनातील सर्व चिंता योगाग्नीमध्ये जळून भस्म होतात व त्यानंतर वैराग्य प्रकटते. म्हणून त्यालाच शास्त्रांत ‘चिताभस्म’ असे संबोधलेले आहे. हेच ‘चिताभस्म’ भगवान श्रीशिवशंकरांना प्रिय असे आहे !’’ असा खुलासा प.पू.सद्‌गुरु श्री. दादांनी ‘चिताभस्मा’संबंधी विचारलेल्या एका प्रश्र्नाचे उत्तर देताना केला. त्यांची अमोघ वाणी आणि शब्दन्‌ शब्द उपस्थित सर्वांना मोहून टाकणारा, अंतर्मुख करणारा तसेच भक्तिमार्गातील वाटचाल सुगम करून देणारा असाच होता. हे सत्र आणि त्यांचे बोलणे कधी थांबूच नये, अशीच सर्व साधकभक्तांची इच्छा होती; मात्र वेळेअभावी हे शंका-समाधान सत्र आवरते घेण्यात आले.

त्यानंतर दुपारी १२.३० ते १.०० या कालावधीत पुण्यस्मरण व आरती संपन्न झाली. त्यानंतर उपस्थित साधकजनांना सद्‌गुरुदर्शनाचा लाभही घेता आला.
कऱ्हाड केंद्रातर्फे श्री.जयवंत क्षीरसागर यांनी प.पू.सद्‌गुरु श्री.शिरीषदादा यांना श्रीफल व पुष्पगुच्छ अर्पण केले. तदनंतर उपस्थित सर्व साधकभक्तांनी महाप्रसादाचा लाभ घेतला आणि अत्यंत तृप्त मनाने व समाधानाने सर्वजण आपापल्या मुक्कामी परतले.