परमपूज्य सद्गुरु मातुःश्री सौ. शकुंतलाताई आगटे जयंती महोत्सव, २०२५

नियोजित वेळी ठीक १०.४५ वाजता प.पू.सद्‌गुरु श्री.अनिरुद्धदादांची प्रवचन-सेवा सुरू झाली. उपरोक्त ओवीचे विवरण करताना प.पू.सद्‌गुरु श्री.अनिरुद्धदादा म्हणाले की; ‘‘श्रीभगवंतांनी अर्जुनाला उपदेश करताना श्री ज्ञानेश्वरीच्या सहाव्या अध्यायात जो ‘अभ्यासयोग’ सांगितला त्यातील बत्तिसाव्या श्लोकावरील टीकेत सद्‌गुरु श्री माउली या ओवीतून महात्म्यांची स्थिती तसेच अभ्यासयोगाची, साधनेची फलश्रुती सांगत आहेत. ते म्हणतात की, ‘महात्मे लौकिक दृष्ट्या जरी देहात राहून व्यवहार करताना, सुख-दुःख भोगताना दिसत असले तरी ते परब्रह्मस्वरूपच असतात, असा आमचा अनुभव आहे !’ प.पू.सद्‌गुरु श्री.मामा आणि प.पू.सद्‌गुरु सौ.ताईं यांचे अवतारकार्य पाहिल्यास ते या ओवीचे मूर्तिमंत उदाहरण असल्याचेच दिसून येते !’’

ब्रह्मर्षी श्री वसिष्ठ महामुनींनी प्रभू श्रीरामचंद्रांना ‘योगवासिष्ठा’त केलेला उपदेश सांगून प.पू.श्री.अनिरुद्धदादांनी पुढे सांगितले की; ‘‘साधनेने प्रामुख्याने साधकांची चित्तशुद्धी होणे आवश्यक असते. मनुष्याच्या चित्तावर असणाऱ्या जन्मोजन्मींच्या संस्कारांच्या परिणामस्वरूप तशा वृत्ती तयार होतात !’’ या संबंधात एका गृहस्थांनी विचारलेल्या प्रश्नाला प.पू.सद्‌गुरु सौ.ताईंनी दिलेले उत्तर उद्‌धृत करून ते म्हणाले की; ‘‘एकदा श्रीब्रह्मदेवांकडे अनेक प्राण्यांनी मनुष्यजन्म मिळावा अशी प्रार्थना केली. त्या वेळी ब्रह्मदेवांनी त्यांना कलियुगात मनुष्यजन्म दिला. त्यामुळे आजच्या काळात प्रापंचिक जीवांची वृत्ती पशूंसारखी असते. एक मनुष्ययोनी सोडली तर इतर सर्व योनी ह्या भोगयोनी आहेत. त्या योनींमध्ये मुक्ती मिळत नाही. याला अपवाद श्रीक्षेत्र आंबेरीच्या ‘तपोवना’तील आपला बैल ‘सर्जा’ हा होता. तो प.पू.सद्‌गुरु मातुःश्री सौ.ताईंवर असलेल्या त्याच्या निखळ प्रेमामुळेच तरून गेला. साधकांनी देखील सद्‌गुरूंच्या प्रेमात इतके वेडे व्हावे की सद्‌गुरूच त्याचे सर्वस्व झाले पाहिजेत. सर्व भूतमात्रांत त्याने सद्‌गुरूंनाच पाहायला हवे !’’

या ओवीतून श्री माउलींनी जसे महात्म्यांचे वर्णन केले आहे तसेच सद्‌गुरुप्रदत्त साधना नियमाने करणाऱ्या साधकांनाही परब्रह्मस्वरूपाची प्राप्ती होईल असे म्हटले आहे. मात्र त्यासाठी साधक कसा असावा आणि त्याच्याजवळ कोणत्या गोष्टी असल्या पाहिजेत ? याबद्दल मार्गदर्शन करताना त्यांनी सांगितले की; ‘‘ ‘श्रीवामनराज प्रकाशना’ने प्रकाशित केलेल्या ‘साधना पथप्रदर्शिका’ ग्रंथात ‘साधक कोणाला म्हणावे ?’ याचे मार्मिक वर्णन आलेले आहे, ते नीट अभ्यासावे. परमार्थात प्रगती होण्यासाठी साधकांच्या अंगी निश्चय, प्रयत्न, सद्‌गुरूंप्रति भक्ती व अनन्य प्रेम असायला हवे. नियमित साधना आणि सद्‌ग्रंथांचा अभ्यास होण्यासाठी दृढ निश्चय आणि प्रयत्नांचे बळ असावे लागते. साधकाने ‘योग’ आणि ‘बोध’ हे दोन्ही साधायचा प्रयत्न केला पाहिजे. नियमितपणे प्रेमाने साधन करून योग साधावा आणि आपल्या प्रकाशनाच्या ग्रंथांचा अभ्यास करून बोधाचे अंग पक्के करावे !’’

प.पू.सद्‌गुरु सौ.ताईंनी बाह्यतः व्यवहारातील सर्व कर्मे दक्षतेने करत असतानाही त्यात लिप्त न होता श्रीसद्‌गुरूंचे सेवाकार्य उत्तम रीतीने संपन्न करून दाखविले. त्यामुळे ही ओवी त्यांना तंतोतंत लागू पडते, असे सांगून प.पू.श्री.अनिरुद्धदादांनी प.पू.सद्‌गुरु मातुःश्री सौ.ताईंच्या जयंती उत्सवाच्या निमित्ताने झालेली प्रवचन-सेवा श्रीसद्‌गुरुचरणीं समर्पित केली.

बोधपूर्ण अशा या प्रवचन-सेवेनंतर ‘श्रीकृष्ण गोविंद हरे मुरारे ।’ व ‘राधे राधे राधे राधे…’ हे नामजप करण्यात आले. तसेच आरती व मंत्रपुष्प होऊन पुण्यकाल साजरा करण्यात आला. श्रीचरणाधिष्ठान मंदिरात दर्शन व तदनंतर तीर्थप्रसाद घेऊन उपस्थित सर्व साधकजन अतिशय तृप्त मनाने, आनंदाने स्वस्थानी परतले.