प.पू.सद्‌गुरु मातुःश्री सौ.शकुंतलाताई आगटे पुण्यतिथी महोत्सव, २०२६

या कार्यक्रमानंतर सर्व साधक, श्रोते नेहमीच ज्याची अत्यंत आतुरतेने वाट पाहत असतात त्या प.पू.श्री.दादांच्या प्रवचन-सेवेला सुरुवात झाली. ग्रंथराज ‘श्री ज्ञानेश्वरी’च्या सहाव्या अध्यायातील दुसरी ओवी त्यांनी सेवेकरिता घेतली होती.

प्रस्तुत ओवीसाठी इतर ग्रंथांमधील संदर्भ पाहण्या करिता ओवी वर क्लिक करावे.

सर्वप्रथम प.पू.श्री.दादांनी ही ओवी सेवेसाठी घेण्यामागची दोन करणे सांगितली. पहिले कारण असे की, त्यांनी सर्वात प्रथम ह्याच ओवीवर सांगली येथे झालेली प.पू.सद्‌गुरु श्री.मामामहाराजांची प्रवचन-सेवा ऐकली होती.

दुसरे कारण म्हणजे, एकदा प.पू.सद्‌गुरु मातुःश्री सौ.ताई आणि प.पू.सद्‌गुरु श्री.दादा ‘रासनिकुंज’ कुटीच्या परिसरात संध्याकाळी फिरायला आले होते. त्या वेळी अचानक प.पू.सौ.ताई प.पू.श्री.दादांना म्हणाल्या की; ‘‘मी येथे राहून ब्रह्मरसाचे पारणे करीन !’’ त्यावर प.पू.श्री.दादांनी त्यांना त्यांच्या त्या वाक्याचा अर्थ विचारला. त्या वेळी प.पू.सौ.ताईंनी त्यांना असे सांगितले होते की, ‘‘श्रीभगवंतांनी माझ्यासाठी ब्रह्मरसाचे पारणे केले आहे, त्याचा लाभ येथे सर्वांना होईल !’’

प्रवचन-सेवेदरम्यान प.पू.श्री.दादांनी असे सांगितले की, ‘‘शक्तिपाताचे असे काही प्रकार आहेत की जो शक्तिपात केवळ श्रीभगवंतच करू शकतात. तसाच मोहाचा शक्तिपात श्रीभगवंतांनी अर्जुनाला केला. श्रीभगवंतांनी अविद्या, मोह इत्यादी कोणत्याही प्रकारचा शक्तिपात जरी केला तरी त्याची सात्त्विक लक्षणेच प्रकट होताना दिसतात. त्यामुळे जरी मोहाचा शक्तिपात केलेला असला तरीही सात्त्विकाचीच सर्व लक्षणे अर्जुनाच्या ठिकाणी दिसू लागली !’’

प.पू.श्री.दादांनी या प्रवचनात ‘मोह आणि महामोह’, ‘स्नेह आणि अतिस्नेह’, ‘पारणे आणि परगुणे’, ‘पाहुणा आणि पाहुणेर’ तसेच ‘अवसर आणि अवस्वर’ इत्यादी शब्दांमधील फरकाचेही विस्ताराने विवरण केले.

या प्रवचन-सेवेत प.पू.श्री.दादांनी ग्रंथराज ‘श्री ज्ञानेश्वरी’चे महत्त्व विशद करताना असेही सांगितले की, ‘‘कलियुगात नामाचा लोप झालेला आहे. ज्या जीवांच्या उद्धाराची वेळ जवळ आलेली आहे त्यांना सप्रभव साधन लाभावे म्हणून प्रत्यक्ष श्रीभगवंतांनी सद्‌गुरु श्री माउलींच्या रूपाने अवतार घेऊन ग्रंथराज ‘श्री ज्ञानेश्वरी’ची रचना केली.

आपल्या श्रीसद्‌गुरूंनी आपल्याला सनाथ करून आपल्या चित्तावर श्रीभगवंतांच्या कृपेची मोहर उठवली आहे म्हणूनच केवळ श्रीभगवंतांनी आपल्याला जवळ केले आहे. श्रीभगवंतांनी आपल्याला त्यांचे पाहुणे केले आहे. हा ‘ब्रह्मरस’ त्यांच्या कृपेने आपल्याला लाभलेल्या या ब्रह्मविद्येचा गाभा आहे. भगवंतांच्या प्रेमशक्तीलाच ‘ब्रह्मरस’ असे म्हटले जाते. ‘श्री ज्ञानेश्वरी’च्या अमृतकलशातून आपल्याला हा ब्रह्मरस लाभणार आहे. मात्र तो श्रीभगवंतांच्या मुखातूनच घ्यायचा असतो. तो त्यांच्या प्रेमाचा आस्वाद आहे !’’

प्रवचनसेवेनंतर, ‘श्रीकृष्ण गोविंद हरे मुरारे हे नाथ नारायण वासुदेव’ व ‘श्री स्वामी समर्थ जय जय स्वामी समर्थ’ हे नामजप करण्यात आले. नामजपानंतर आरती-मंत्रपुष्प होऊन तदनंतर ‘प्रेमसुमनांजली’चे गायन होऊन अत्यंत भावपूर्ण रीतीने कार्यक्रम संपन्न झाला. नामजप आणि आरती श्रीक्षेत्र आंबेरी येथील प्रकल्पनिवासी साधकबंधूंनी म्हटली. कार्यक्रम संपन्न झाल्यानंतर सर्व उपस्थितांनी श्रीभगवंतांचे, उभय सद्‌गुरु श्रीस्वामी महाराजांचे व प.पू.सद्‌गुरु सौ.ताईंचे दर्शन घेतले. त्यानंतर तीर्थप्रसाद होऊन महाप्रसादाने कार्यक्रमाची सांगता झाली.

नेहमीप्रमाणेच महोत्सवप्रसंगी प्रकल्पस्थानी ‘श्रीवामनराज प्रकाशना’चे ग्रंथ तसेच आंबेरी येथे तयार होणारी सेंद्रिय उत्पादने विक्रीसाठी ठेवण्यात आली होती, त्यांना साधकांचा उत्तम प्रतिसाद मिळाला. महोत्सवाच्या सुखद स्मृती हृदयात साठवून सर्व साधक तृप्त मनाने आपापल्या स्थानी रवाना झाले.