श्रीगुरुद्वादशी महोत्सव, २०२४

संध्याकाळी ठीक पाच वाजता ज्या सोहळ्याची सर्वजण प्रतीक्षा करीत होते तो श्रीभगवंतांचा पालखी-सोहळा सुरू झाला. प्रथम ‘जय जय राम कृष्ण हरी’ने भजनाला प्रारंभ झाला. ‘रूप पाहतां लोचनी’ हा रूपाचा अभंग म्हटल्यानंतर राजदंड, छत्र-चामरे-मोरचेल, अब्दागिऱ्या या सर्वांसह असलेल्या पालखीमध्ये श्रींच्या पादुका विराजमान झाल्या आणि मग प.पू.सद्‌गुरु श्री. शिरीषदादांच्या नेतृत्वाखाली पालखी-प्रदक्षिणा सुरू झाल्या. पालखीच्या तीन प्रदक्षिणांमध्ये साधक-भक्तांनी विविध अभंगांचे तसेच ‘करुणात्रिपदी’चे गायन केले. ते श्रवण करताना तसेच टाळकऱ्यांच्या पावल्या बघताना सर्व उपस्थित मंत्रमुग्ध झाले होते. पालखी-सोहळ्यानंतर आरती झाली. तोपर्यंत काळोख पडू लागला होता. मंदिरात आरती सुरू असतानाच साधकांनी मंदिराभोवतीच्या प्रांगणात, नामसमाधी मंदिराच्या सभोवती तसेच श्रीगुरु-पादुका मंदिराजवळ आणि श्री मारुतिरायांच्या मंदिराजवळ पणत्यांची मांडणी केली.

आरती संपन्न झाल्यानंतर प.पू.श्री.अनिरुद्धदादांनी त्रिपुरावरील पणती लावून दीपोत्सवास सुरुवात केली. त्यानंतर साधक-बंधुभगिनींनी सर्व पणत्या लावल्या आणि संपूर्ण परिसर दिव्यांच्या प्रकाशाने उजळून निघाला. त्यानंतर सर्व उपस्थित साधक-सद्‌भक्तांनी शिस्तबद्ध रीतीने श्रीभगवंतांचे दर्शन घेतले आणि तीर्थ-प्रसाद घेऊन सर्वजण आपापल्या स्थानी परतले.